POESIA

Nung Aliwa Y Amung Ed,
Ninu Pa, O Balen Cung Capampangan ? ( Poesia )
Neng Jose Roman R. Laquian
12:30 am.
07 Septiembre 2008 ( Domingo )

O Capatad cung Macudta qng Amanung Sisuan mana ,
iting bague pisasabian tuncul queng pamilaco na
queng puesto nang Gobernador Ed Panlilio ning Pampanga ,
iting bague babalacan daring cacalaban quea
marapat yang pibulayan nung nanu ing maguing bunga ,
nung ing taung manalili tune caya tumagun ya
para queng ycasaplala na niting Indung Tibuan ta
pati na qng Cultura at qng mal tang Literatura .

Ngeni pamu papampanan de ing aldo't cabucasan
dening puersa ning dalumdum a magpilit mamye lulam .
Pipilit dang y Amung Ed milaco ya catunculan
pauli ning pansariling interes da't capacanan
ela mengapanusignan pamanaco't panaquitan
caring dapat dang marawac . Ela tune manunculan
para queng ycasaplala ning quecatang Balen tibuan
ni ning Sisuan tang Amanu at Culturang Capampangan .
Iti alang capagdudan , Capatad cu , ala tamung
ayaliling Gobernador cang Amung Eddie panlilio .
Pablasang ding magpalaco't magnasa qng queang puesto
ila dening marinat at mapanacong politico
a ala man masabal queng mayap a pamangobierno :
tapat pamanunculan at caring tau magserbicio .
Pansarili dang interes ing susulung dang malino
at ali ing masabal qng Balen at Sisuan Amanu .

Tune , midinan tana pin " Aldo Ning Amanung Sisuan "
aldong pagmaragul taya ing Amanung Capampangan
ulina ning atin tamung Tune Ibpa ning Balayan
a maqui pusung malugud qng Amanu tang Pimanan ,
y Amung Ed , Gobernador ning Balen tang Capampangan ,
talasaguip qng Amanung dinalan qng casaquitan .
Pauli na , ing Amanu mibangun ya't mipanuanan ,
ya ing Tune Gobernador a dapat tang quilalanan .

Tune , nung balican taya ing panaun milabasan ,
at dening memanunculan quecata lang pacasurian :
ala carelang miwangis cang Amung Ed a uliran
qng Tune Pamagmasabal qng Amanung Capampangan .
Qng dalan a teluntun da ding Poetang Matenacan
at medilig queng lua't daya daring Bayaning Matapang ,
pasibayu , ngeni pamu , atin tamung Mamuntucan
a magnasang ing Amanu tamu lubus neng saguipan .

Ing Guintung Siglo ning quecang Cultura't Amanung Sisuan
Dinatang ne ! Dinatang ne ! O Balen cung Capampangan !
Mibangun Ca ! Gobernador mu ing quecang Ipaglaban !
Ya ing Tune Magmasabal queca't queang pacamalan !
Dening alting campun na ning dalumdum ampon ning lulam ,
dening mangatacong manunculan queng Balen tang Tibuan
a alang lugud qng Cultura at qng Amanung Sisuan ,
ilang dapat tang ilaco , at emu paldac-sicaran !

Balang metung quecatamu a malugud qng Amanu ,
Dayang Tune Capampangan ampon Tune Pilipinu ,
Miabe-abe't micagum ampon misanmetung tamu :
Manalacaran tamungan ampon pagpursiguian tamu
ilaco ding politicong sabagcal qng pamibayu ,
ilang macasalabat qng Mayap a Pamangobierno ,
Mibangun ta't e paburen mawala pang pasibayu
Ing Guintung Siglo ning Balen at ning Sisuan tang Amanu !