MISSING THE ACTION by: Kiko Ortelano

Bukas Pasko na!

Dakal kekatamu ing gagawan da ing anggang agyu da ban maging masaya ya ing pasko. Maski na masakit ing bie ngeni, ing pasko pane yang babie pag-asa at tula kekatamu.

Balu tamu ngan na ing pasko metung ya karing pekamasalang gawa ning GUINU tamu para masalang mayakit nung makananu na ka tamu kaluguran. Subali kanita, buri ku sanang pasyag ing metung pang maulagang papalto ning pasko kekatamu.

Iti ya ing KABABAN A LUB.

Inyang binie ne ning IBPA tamu ing kayang bugtong a anak, pepalto nang dapat makayagnan ing lugud king kababan a lub. Alang tune lugud nung alang kayabe kababan a lub.

Itamu ngan, uli ning lelangan na ka tamu ning GUINU, sadya tamung mayap pangatau. Wapin madalas magkamali tamu; mikakasala tamu. Potang magkamali tamu at mikakasala, midadayu tamu king GUINU. Ing kababan lub tamu, lalto neman potang tatanggapan tamu ing kekatamung pamagkamali at panyawad tamung kapatawaran iti.

King pamanyulung tamu king malinis a pamamahala at mayap a pamakimemalen king kekatamung lalawigan, atin tamu naman pamagkulang at pamagkamali. Iti ali mu karing meging katunggali tamu king kekatamung susulungan, nune pati mu rin karing kekatamung meging kayabe.

Ing KASAUP, Inc., tutu yang makatao at tutu yang lulugud king kekatamung lalawigan. Uli ning kakambal ne pin ning tune lugud ing kababan a lub, buong kaladua ming papasyag ing pamanyawad ming kapatawaran karing anggang tao a agawan ming pamagkamali.

Papasyag mi naman na ing KASAUP lalo ne pang isulung ing alang patnang kasuyuan na king lalawigang KAPAMPANGAN.

MASAYANG PASKO PU KEKAYU NGAN!